Val Do-ს ბლოგი

ჯავასკრიპტის თითქმის ყველა თანამედროვე framework-ში, გვხვდება ეგრედ წოდებული factory ფუნქციები, ამ ბლოგში, შევეცდები მარტივი მაგალითებით ავხსნა თუ რას წარმოადგენს factory ფუნქცია და რითი განსხვავდება ის ჯავასკრიპტის კლასებისგან.

factory function (ქარხანა ფუნქცია) არის ფუნქცია, რომელიც აბრუნებს ობიექტს. თავად სახელწოდებაც პირობითადაა შერქმეული, ვინაიდან ეს ფუნქციები ქმნიან ობიექტებს.

factory ფუნქციების საშუალებით, შეგვიძლია შევქმნათ ობიექტი new საკვანძო სიტყვის (keyword) ან constructor() ფუნქციის გარეშე, ასევე არაა საჭირო გამოვიყენოთ this საკვანძო სიტყვა.

მაგალითი:

function createPerson(name, age) {
  return {
	name,
	age,
	greet() {
  	    console.log(`Hello, my name is ${this.name} and I'm ${this.age} years old.`);
	}
  };
}

const person = createPerson("Alice", 30);
person.greet(); // დაიბეჭდება: Hello, my name is Alice and I'm 30 years old.

ასევე ეს ფუნქციები ენკაფსულაციის საშუალებასაც გვაძლევს, რაც გულისხმობას, იმას, რომ გვქონდეს ე.წ. private ცვლადები და მეთოდები, მაგრამ constructor ფუნქციებისგან განსხვავებით factory ფუნქციებში არ შეგვიძლია გამოვიყენოთ inheritance.

მაგალითი:

function createPerson(name, age) {
  // Private data
  let secret = "I'm a secret!";

  return {
	name,
	age,
	greet() {
  	    console.log(`Hello, my name is ${this.name} and I'm ${this.age} years old.`);
	},
	revealSecret() {
  	    console.log(secret);
	},
  };
}

const person = createPerson("Alice", 30);
person.revealSecret(); // დაიბეჭდება: I'm a secret!

---

პ.ს. მოცემული მაგალითებში არ არის სრულფასოვნად მოყვანილი ყველა ძირითადი განსხვავება კლსაებთან მიმართებაში, დეტალურ განსხვავებებს შემოგთავაზებთ ცალკე ბლოგში.

პროგრამირება 21-ე საუკუნეში ერთ-ერთი ყველაზე მაღალანაზღაურებადი სფეროა. საქართველოში ბოლო წლებში პოპულარული გახდა სლოგანები, როგორიცაა: „ისწავლე პროგრამირება 3 თვეში და დასაქმდი“, თუმცა ასეთ დაპირებებში ხშირად სიმართლე არ არის.

ამ ბლოგში განვიხილავ, რატომ არ არის პროგრამირება ყველასთვის და რატომ არ შეუძლია ყველას გახდეს წარმატებული დეველოპერი. ასევე, გაგიზიარებთ 7 აუცილებელ უნარს, რომელთა გარეშე წარმატების მიღწევა ამ სფეროში რთული იქნება.

1. მოთმინება და ნებისყოფა.

მიუხედავად უამრავი რეკლამისა, რომელიც გვპირდება 3-4 თვეში სამსახურის დაწყებას, ეს სულაც არაა ასე.

პროგრამირების შესწავლის დაწყება მართლაც არაა რთული, მაგრამ ამ საქმის დაუფლებას სჭირდება არნახული მოთმინება და ნებისყოფა.

თავად შესწავლის პროცესში, ყოველთივსაა ისეთი თემები, რომლებსაც 1-2 გადაკითხვით ნამდვილად ვერ გაიაზრებთ და აუცილებელი იქნება კონკრეტული საკითხების სიღრმეებში ძიება, რასაც შესაძლოა დღეები და კვირებიც კი დასჭირდეს.

თუ არ გაქვთ ნებისყოფა, რომ რთული თემები ბოლომდე გაიგოთ და არ დანებდეთ, ეს სფერო თქვენთვის არ არის.

2. პრობლემების გადაჭრის უნარი.

პროგრამირება არაა მხოლოდ, რომელიმე პროგრამირების ენის ბრძანებების დაზეპირება, აქ მთავარი პრობლემების გადაჭრის უნარია.

ამ უნარის გამომუშავება შესაძლებელია, რომელიც მოითხოვს ლოგიკურ და ანალიტიკურ აზროვნებას, ასევე აუცილებელია იყოთ დეტალებზე ორიენტირებული.

ამ სფეროში ყოველთვისაა კომპლექსური დავალებები, რომლებიც მოითხოვენ პატარ-პატარა ნაწილებათ დაშლას და ნაბიჯ-ნაბიჯ გადაწყვეტას.

საკმაოდ ბევრი ადამიანისთვის, მსგავსი ჩაკირკიტება კონკრეტულ პრობლემებზე საკმაოდ უსიამოვნო საქმეს წარმოადგენს, ასე რომ, თუ არ გიყვართ ფაზლების გადაწყვეტა მაშინ ეს სფერო თქვენთვის არაა.

3. დაუსრულებელი სწავლა.

თუ ჩემს ბლოგებს თვალყურს ადევნებთ ეს პუნქტი ალბათ უკვე კარგად იცით, მაგრამ მაინც მომიწევს გავიმეორო.

ტექნოლოგიები ყოველდღიურად ვითარდება, გამოდის ახალი framework-ები, ბიბლიოთეკები, რომლებსაც აუცილებელია ფეხი ავუწყოთ, შესაბამისად რაც შეიძლება დღეს კარგად ვიცოდეთ ხვალისთვის შესაძლოა უკვე მოძველებული იყოს.

ზოგი ადამიანისთვის დაუსრულებელი სწავლა საკმაოდ რთულია და ურჩევნია სხვა რამეზე ფოკუსირდეს, ასე რომ, თუ თქვენ არ გიზიდავთ ყოვლდღიური სიახლეები და მათი შესწავლა მაშინ ეს სფერო თქვენი არ არის.

4. ფოკუსირება ერთ საკითხზე.

აქ ისევ ჰოლივუდის ფილმების მაგალითს და მცდარ შეხედულებებს მოვიყვან, დარწმუნებული ვარ გექნებათ ნანახი, როდესაც პროგრამისტი ზის ეკრანთან და ელვის სისწრაფით ტეხავს სხვადასხვა სისტემებს, დამიჯერეთ ამ ფილმებს რეალობასთან საერთო არაფერი აქვს.

მიუხედავად იმისა, რომ პროგრამისტს გუნდური მუშაობა მოეთხოვება, უშუალოდ კოდის წერის პროცესი მოითხოვს ფოკუსირებას და ხანდახან რამდენიმე დღიან ფიქრს თუ როგორ გადაჭრათ კონკრეტული პრობლემა.

შესაძლოა 2 ხაზის დაწერისთვის რამდენიმე დღეც კი დაგჭირდეთ, ასე რომ, თუ თქვენ მარტივად გეფანტებათ გონება და დიდი ხნით ვერ ახდენთ ფოკუსირებას, მაშინ ჯობს სხვა საქმეს დაუთმოთ დრო.

5. პირველი სამსახურის დაწყება.

მიუხედავად იმისა, რომ ინტერნეტში უამრავი რესურსია პროგრამირების შესწავლაზე, თქვენი პირველი სამსახური შესაძლოა საკმაოდ დიდ ხნიანი მოლოდინის შემდეგ დაიწყოთ.

ხელოვნური ინტელექტის ეპოქაში, იმისთვის, რომ სამსახური დაიწყოთ საკმაოდ ბევრი რამის საფუძვლიანად ცოდნა მოგეთხოვებათ.

გარდა ამისა, ზემოთ ნახსენები ტრენდიდან გამომდინარე, საკმაოდ ბევრი ადამიანი ცდილობს ამ პროფესიაში ფეხის მოკიდებას, რაც თავისთავად კონკურენციას ზრდის.

იმის მოლოდინით რომ 3 თვეში სამსახურს დაიწყებთ, ჯობია საერთოდ არ დაიწყოთ ამ სფეროს შესწავლა, ვინაიდან, კონკურენტუნარიან პროგრამისტად ჩამოყალიბებას წლები სჭირდებას.

6. კომპიუტერთან დიდხანს ჯდომა.

პროგრამირების შესწავლა და ამ სფეროში მუშაობის დაწყება გულისხმობს კომპიუტერთან დიდი დროის გატარებას.

რაც არ უნდა ეცადოთ, ეკრანთან ნაკლები დრო გაატაროთ, ბალანსის დაცვა საკმაოდ რთულია. ზოგიერთი საკითხი მოითხოვს ღრმა კონცენტრაციას, რაც ხშირად გულისხმობს ხანგრძლივ მუშაობას ეკრანთან.

თუ თქვენთვის უფრო მნიშვნელოვანი ადამიანებთან უშუალო ურთიერთობაა, ეს პროფესია შესაძლოა თქვენთვის შესაფერისი არ იყოს.

7. დეტალებზე ორიენტირებულობა.

ამ სფეროს სჭირდება უკიდურესი ყურადღება დეტალების მიმართ, თქვენ წარმოიდგინეთ ერთი გამოტოვებული წერტილი ან მძიმე, შეიძლება გახდეს ისეთი შეცდომის გამომწვევი, რომელმაც შესაძლოა მთელი დღეც კი დაგაკარგვინოთ.

ზოგიერთი ადამიანისთვის ყოველ სიმბოლოზე და ყოველ დეტალზე ყურადღების გამახვილება შესაძლოა სტრესთან იყოს დაკავშირებული.

ასე რომ, თუ ეს თქვენთვის სტრესის გამომწვევი იქნება ჯობია პროგრამირებას ახლოს არ გაეკაროთ.

---

დასკვნა.

ამ ბლოგით შევეცადე განმეხილა ჩემი აზრით ტოპ 7 უნარი, რომელიც პროგრამირების შესწავლისას გამოგადგებათ.

მოცემული უნარების გამომუშავება შესაძლებელია თქვენს თავზე მუშაობით, მაგრამ თუ მაინც ფიქრობთ, რომ ეს უნარები თქვენი ძლიერი მხარე არაა ჯობს დიდი ფინანსების ჩადების გარეშე უფასო რესურსებით სცადოთ პროგრამირების შესწავლა.

პროგრამირების შესწავლა არც ისე რთულია თუ თქვენ გიყვართ პრობლემების გადაწყვეტა, ყოველდღიური სწავლა და გაქვთ ძლიერი ნებისყოფა.

საკმაოდ ბევრი დამწყები დეველოპერისთვის გაურკვეველია CSS-ის ამ ორი ერთეულის მნიშვნელობა, ესენია rem და em საზომი ერთეულები, დღევანდელ ბლოგში გავარკვევთ თუ რა განსხვავებაა ამ ორ ერთეულს შორის და რატომაა საჭირო მათი თვისებების ცოდნა.

მოცემული ერთეულები ძირითადად გამოიყენება font-size, margin, padding და კიდევ სხვა თვისებების ზომებისთვის.

em ერთეული

განვიხილოთ em ზომის ერთეული. ეს ერთეული გამოითვლება მისი მშობელი ელემენტის შრიფტის ზომის მიხედვით ანუ font-size-ით, ხოლო თუ მის მშობელს არ აქვს განსაზღვრული font-size თვისება, დოკუმენტის ხეში მიყვება მშობლის შემდეგ ყველა წინაპარ ელემენტს.

იმ შემთხვევაში თუ მის არცერთ წინაპარს არ ქონდა ფონტის ზომა გაწერილი, აიღებს ბრაუზერის ე.წ. საწყისი მნიშვნელობის font-size-ს, რომელიც როგორც წესი 16px-ია

თუ მშობელი ელემენტის font-size თვისების მნიშვნელობა არის 16px, მაშინ 1em = 16px-ის.

მაგალითი:

/* მშობელი ელემენტის ფონტის ზომა 16px */
.parent {
  font-size: 16px;
}

.child {
  font-size: 1.5em; /* 1.5 * 16px = 24px */
}

როგორც მაგალითშია მოყვანილი ვინაიდან .parent ელემენტის font-size არის 16px, 1em იქნება ასევე 16px-ის ზომის, ხოლო თუ .parent ელემენტი იქნებოდა 20px, 1em იქნებოდა 20px-ის ტოლი და ასე შემდეგ.

---

rem ერთეული

გავნიხილოთ rem საზომი ერთეული. მოცემული ერთეული მუშაობს em ერთეულის მსგავსად, უბრალოდ ის დამოკიდებულია არა მის უშუალო მშობელზე არამედ ეგრედ წოდებულ root ელემენტზე, რომელიც html-ში წარმოადგენს <html> თეგს.

მაგალითი:

html {
  font-size: 16px; /* Default browser size */
}

h1 {
  font-size: 2rem; /* 2 * 16px = 32px */
}

rem ერთეულის ზომაც მუშაობს ანალოგიურად, როგორც em განსხვავება მხოლოდ იმაშია, რომ მისი ზომა გამოითვლება აუცილებლად root ელემენტიდან.

თუ ზემოთ მოყვანილ მაგალითს გავარჩევთ, ვინადიან html ელემენტის ზომა არის 16px, 1rem იქნება 16px, ხოლო 2rem 16*2-ზე რაც 32px-ს წარმოადგენს.

---

რაში გვჭირდება ამ ერთეულების გამოყენება?

მოცემული ერთეულები ძირითადად გამოიყენება ადაპტირებული ვებ-გვერდებში.

იმის მაგივრად, რომ ყველა ჩვენს მიერ განსაზღვრულ ელემენტს ცაცლ-ცალკე გავუწეროთ ზომები, მარტივად მაგალითად root ელემენტის ზომების შეცვლით შეგვიძლია ვცვალოთ მთელი დიზაინი.

HTML:

<button class="btn">Click Me</button>

CSS:

html {
  font-size: 16px;
}

.btn {
  font-size: 1rem; /* 16px */
  padding: 0.5rem 1rem; /* 8px top/bottom, 16px left/right */
}

@media (max-width: 768px) {
  html {
    font-size: 14px; /* Smaller font size */
  }
}

@media (max-width: 480px) {
  html {
    font-size: 12px; /* Smallest font size */
  }
}

Frontend დეველოპმენტი პროგრამირების ერთ-ერთი გავრცელებული და მოთხოვნადი მიმართულებაა, დღევანდელ ბლოგში შევეცდები, მაქსიმალურად გასაგებად ავხსნა, თუ რას წარმოადგენს ის.

იმედი მაქვს ეს ბლოგი დაგეხმარებათ სწორი მიმართულების არჩევაში თქვენს კარიერულ გზაზე.

რა არის Frontend დეველოპმენტი?

როდესაც თქვენ ხსნით რაიმე საიტს, რასაც თქვენ ხედავთ, აკლიკებთ თუ აკეთებთ რაიმე ინტერაქციას ვებ-გვერდთან ეს ყველაფერი წარმოადგენს Frontend დეველოპმენტის შედეგს.

Frontend დეველოპმენტი პასუხისმგებელია ვებ-გვერდის ყველა იმ ნაწილზე, რომელთანაც მომხმარებელი შედის ინტერაქციაში, საიტის ფერი, დიზაინი, შრიფტი, ელემენტების განლაგება და კიდევ მრავალი სხვა.

რას მოიცავს Frontend დეველოპმენტი?

მოცემული განხრის მთავარი მიზანია, საიტის ვიზუალური მხარე და მასთან დაკავშირებული თემები, ისეთები როგორებიცაა:

• განლაგება და დიზაინი: შრიფტები სურათები, ღილაკები მათი მდებარეობა ვებ-გვერდზე.
• ადაპტირებულობა: აუცილებელია ვებ-გვერდი ადაპტირებული იყოს ნებისმიერი ეკრანის ზომის მქონე მოწყობილობასთან.
• ინტერაქცია: ანიმაციები, დროფდაუნ მენიუები, ფორმის ვალიდაციები და სხვა მრავალი ინტერაქცია.

Frontend დეველოპერის როლი.

Frontend დეველოპერის მთავარი ამოცანაა, დიზაინერის მიერ მომზადებული დიზაინის კოდად გარდაქმნა, რაც  თავისთავად მოიცავს შემდეგ თემებს:

• შექმნას მომხმარებლის ინტერფეისი: პროექტის დიზაინერის მიერ დახატული ფაილი, გადათარგმნოს კომპიუტერისთვის გასაგებ ენაზე, რომლებიც მოიცავენ HTML, CSS, და JavaScript ენებს.
• ვებ-გვერდის ოპტიმიზაცია: დარწმუნდეს, რომ ვებ-გვერდი ბრაუზერში იტვირთება სწრაფად იმ შემთხვევაშიც კი, თუ მომხმარებელს არ აქვს მაღალი სისწრაფის ინტერნეტი.
• ტესტირება და დებაგინგი: დარწმუნდეს და შეამოწმოს ვებ-გვერდი სხვადასხვა ბრაუზერების თავსებადობასთან, ვინადიან, ბრაუზერები იყენებენ სხვადასხვა სტანდარტებს ვებ-გვერდის კოდის წასაკითხად.
• კოლაბორაცია დიზაინერებთან და backend დეველოპერებთან: როგორც ჩემს არაერთ ბლოგში ვახსენე, პროგრამირება არის გუნდური უნარების საჭიროების მქონე პროფესია, შესაბამისად, აუცილებელია გვქონდეს უნარი, რომელიც საშუალებას მოგვცემს ვიურთიერთოთ გუნდის დანარჩენ წევრებთან, დავრწმუნდეთ, რომ ყველაფერი ისე მიდის, როგორც პროექტის გეგმაშია გაწერილი.

ძირითადი ტექნოლოგიები Frontend-ში.

Frontend დეველოპმენტი ძირითადად მოიცავს შემდეგ ტექნოლოგიებს:

1. HTML (Hyper Text Markup Language): ეს ენა პასუხიმსგებელია ვებ-გვერდის სტრუქტურაზე, მისი დახმარებით გამოისახება ისეთი ელემენტები როგორებიცაა, სურათები, სათაურები, პარაგრაფები და ა.შ.
2. CSS (Cascading style sheets): პასუხისმგებელია ვებ-გვერდის დიზაინზე, მაგალითად რა ზომის სურათი იყოს ვებ-გვერდზე, რა ფერის ღილაკი და ა.შ.
3. JavaScript: გვაძლევს საშუალებას, სტატიკური ვებგვერდი გავხადოთ ინტერქაციული, მაგალითად დავამატოთ დროფდაუნ მენიუები, ავაწყოთ ფორმის ვალიდაციები და ა.შ.

ასევე მინდა ავღნიშნო, რომ ზემოთ ჩამოთვლილი ტექნოლოგიების ცოდნა არაა საკმარისი და Frontend დეველოპერისთვის ასევე აუცილებელია გაარჩიოს შემდეგი ტექნოლოგიები:

• ფრეიმვორქები და ბიბლიოთეკები: როგორებიცაა React.js, Angular ან Vue.js, ეს ტექნოლოგიები საშუალებას გვაძლევს ავაწყოთ კომპლექსური პროექტები უფრო მარტივად.
• ვერსიების კონტროლის სისტემა Git: ამ ტექნოლოგიის გარეშე, შეუძლებელია გუნდური მუშაობა თანამედროვე პროგრამირების სამყაროში.

როგორ გავხდეთ Frontend დეველოპერი?

თუ დაინტერესებული ხართ ამ პროფესიის შესწავლით და გინდათ დასაქმდეთ მაღალანაზღაურებად სამსახურში, ეს უნარები და ცოდნა გამოგადგებათ:

1. შეისწავლეთ საწყისები.

დაიწყეთ HTML-ის შესწავლით და კარგად გაიაზრეთ თუ როგორ მუშაობს ვებ-გვერდის სტრუქტურა, ისწავლეთ CSS ენა და დარწმუნდით, რომ თქვენი ვებ-გვერდი თავსებადია ყველა თანამედროვე ბრაუზერთან თუ მოწყობილობასთან.

შეისწავლეთ JavaScript-ის და პროგრამირების საფუძვლები, არ გამოტოვოთ არც ერთი პატარა თემაც კი.

2. აღმოაჩინეთ უფრო რთული თემები.

ისწავლეთ, თუ როგორ გამოჩნდეს თქვენი ვებ-გვერდი ყველა ზომის ეკრანზე ოპტიმალურად, შეისწავლეთ Git ვერსიების კონტროლის სისტემა, სცადეთ თანამედროვე JavaScript framework-ები, როგორებიცაა Reactjs, Angular ან Vue.js

3. პრაქტიკა, პრაქტიკა და პრაქტიკა.

თეორიული ცოდნა არაფერია, თუ პრაქტიკით არაა გამყარებული, დაიწყეთ ყველაზე მარტივი პროექტების კეთება და ნელ-ნელა ეცადეთ გადახვიდეთ რთულ პროექტბზე. გაიღმავეთ თქვენი პრობლემების გადაჭრის უნარები ისეთი ვებ-გვერდებით, როგორებიცაა მაგალითად codewars და leetcode.

4. იყავით ცნობისმოყვარე.

პროგრამირება ყოველდღიურად იცვლება, არ დაკმაყოფილდეთ დღევანდელი ცოდნით, ყოველთვის ეცადეთ გაარჩიოთ ახალი ტექნოლოგიები რათა დარჩეთ შრომით ბაზარზე კონკურენტუნარიანი.

Frontend დეველოპმენტი კრეატიულობისა და ტექნიკური უნარების საინტერესო შერწყმაა. თუ გატაცებული ხართ დიზაინით, გიყვართ პრობლემების გადაჭრა ან უბრალოდ გსიამოვნებთ, როცა ყველაფერი იდეალურად მუშაობს, ფრონტენდი გთავაზობთ უსაზღვრო შესაძლებლობებს, შექმნათ მნიშვნელოვანი და მომხმარებელზე მორგებული გამოცდილებები. თუ მზად ხართ, ჩაეფლოთ ვებ დეველოპმენტის სამყაროში, დაიწყეთ საფუძვლებიდან, იმუშავეთ პროექტებზე და დაინახეთ, სად მიგიყვანთ თქვენი ცნობისმოყვარეობა!

იმისთვის, რომ დეველოპმენტი ბევრად ავაჩქაროთ და რაც შეიძლება ნაკლები დრო დავკარგოთ ტექსტური რედაქტორის საჭირო ფუნქციების საპოვნელად, აუცილებელია, ვიცოდეთ იმ ღილაკების კომბინაციები, რომლებიც დღეში რამდენიმე წუთს დაგვიზოგავს.

დღევანდელ ბლოგში, განვიხილავ VS Code-ის ტოპ 8 ღილაკის კომბინაციას, ეგრედ წოდებულ shortcut-ებს.

1. სწრაფი ფაილების ძიება.

Shortcut: Ctrl + P (Windows/Linux) / Cmd + P (Mac)

როდესაც ჩვენი პროექტის ფაილური სტრუქტურა ზომაში იზრდება, რთულია სასურველი ფაილის მაუსით ძებნა.

მოცემული ბრძანებით, გამოდის ჩანართი, რომლის დახმარებითაც სასურველი ფაილი მარტივად მისი დასახელებით შესაძლებელია ვიპოვოთ ჩვენი პროექტის დირექტორიაში.

2. ინტეგრირებული ტერმინალის გამოძახება.

Shortcut: Ctrl + ` (Windows/Linux/Mac)

არ აქვს მნიშვნელობა ხართ დამწყები პროგრამისტი თუ გამოცდილი, VS Code-ის ინტეგრირებული ტერმინალის გამოყენება თქვენი დეველოპმენტის განუყოფელი ნაწილი აუცილებლად იქნება.

ტერმინალის გასახსნელად და დასახურად (toggle terminal) ბრძანება საკმაოდ აწევს თქვენს პროდუქტიულობას, იმის მაგივრად, რომ ყოველ ჯერზე მენიუდან გავხსნათ.

უბრალოდ დავაჭიროთ Ctrl + ` ღილაკების კომბინაციას და სურვილის შემთხვევაში გამოვაჩინოთ ან დავმალოთ.

3. სახელის გადარქმევა.

Shortcut: F2 (Windows/Linux/Mac)

დარწმუნებული ვარ, ერთხელ მაინც გქონიათ შემთხვევა, როდესაც დიდ ფაილში მოგიწიათ ფუნქციის, ცვლადის ან კლასის სახელის გადარქმევა, წარმოიდგინეთ რამდენად რუტინულია მოძებნოთ ეს სახელი და სათითაოდ გადაარქვათ, დამიჯერეთ სადმე მაინც შეიძლება გამოგრჩეთ რამე.

სწორედ ამისთვის არსებობს ეს ბრძანება, უბრალოდ დავდგებით იმ ცვლადის, ფუნქციის ან კლასის სახელზე მოვნიშნავთ დავაჭერთ F2-ს ჩავწერთ სასურველ სახელს და მთელი ჩვენი ფაილი შეიცვლება.

4. მსგავსებების მონიშვნა.

Shortcut: Ctrl + D (Windows/Linux) / Cmd + D (Mac)

ხანდახან არის, შემთხვევა, როდესაც გვჭირდება ერთმანეთის მსგავსი ტექსტის შეცვლა, სწორედ ამისთვის გამოიყენება Ctrl + D / Cmd + D ბრძანება.

შეგვიძლია მოვნიშნოთ ტექსტი, რომლის მსგავსი დამთხვევების შეცვლაც გვჭირდება და დავაკლიკოთ ამ ღილაკების კომბინაციას, ყოველ შემდეგ დაკლიკებაზე მოინიშნება შემდეგი დამთხვევა.

შემდეგ კი შეგვიძლია წავშალოთ ან შევცვალოთ მონიშნული რეზულტატები.

5. მულტი კურსორი.

Shortcut: Alt + mouse left click (Windows/Linux/Mac)

არის შემთხვევები, როდესაც რაიმე ტექსტის ჩანაცვლება, დამატება ან თუნდაც წაშლა გვჭირდება რამდენიმე ადგილას, სწორედ ამაში გამოგვადგება მულტი კურსორი, თუ დავაჭერთ Alt ღილკას და აშვების გარეშე მაუსის მარცხენა კლიკით მოვნიშნავთ იმ ადგილებს სადაც გვინდა ცვლილების განხორციელება დავინახავთ, რომ გამოისახება კურსორის მანიშნებელი ხაზი.

ამ ხაზით მარტივად შეგვიძლია ჩავანაცვლოთ, ან წავშალოთ ნებისმიერი ტექსტი.

6. Command Palette.

Shortcut: Ctrl + Shift + P (Windows/Linux) / Cmd + Shift + P (Mac)

მოცემული ღილაკების კომბინაციით გამოდის ჩანართი, რომელიც საშუალებას გვაძლევს მოვძებნოთ ტექსტური რედაქტორის ნებისმიერი პარამეტრი და შევცვალოთ ის, მაგალითად შევცვალოთ რედაქტორის თემა, ფაილური აიქონების თემა და ა.შ.

ამ ღილაკების კომბინაციით შეგვიძლია მივწვდეთ ედითორის ნებისმიერ პარამეტრს.

7. File Explorer-ის გამოჩენა დამალვა.

Shortcut: Ctrl + B (Windows/Linux) / Cmd + B (Mac)

ამ ღილაკების ფუნქციონალი განსაკუთრებით მათ გამოგადგებათ, ვისაც პატარა ზომის მონიტორთან გიწევთ მუშაობა, ამ ღილაკებით შეგვიძლია დავმალოთ ან გამოვაჩინოთ ე.წ. File Explorer, რომლის დამალვაც ეკრანის სივრცეს დაგვიზოგავს კოდის უკეთ წასაკითხად.

8. სწრაფად დაკომენტარება.

Shortcut: Ctrl + / (Windows/Linux) / Cmd + / (Mac) - ერთხაზიანი კომენტარი.

Shortcut: Alt + Shift + A (Windows/Linux/Mac).

კოდის წერის პროცესში აუცილელად დაგვჭირდება გარკვეული სახის ინფორმაციის ან თუნდაც კოდის დაკომენტარება, ამისთვის უმარტივესი გზა შემდეგი ღილაკების კომბინაციაა Ctrl + / ან Cmd + /

მოცემული ღილაკებით დავაკომენტარებთ იმ ხაზს რომელზეც ვდგავართ.

ასევე ხანდახან არის საჭიროება, დავაკომენტაროთ რამდენიმე ხაზი მრავალხაზიანი კომენტარის სინტაქსით, რომელიც მაგალითად ჯავასკრიპტში არც თუ ისე კომფორტული ჩასაწერია.

სწორედ ამაში გვეხმარება Alt + Shift + A ღილაკების კომბინაცია, რომლის დახმარებითაც, მარტივად დავაკომენტარებთ კოდის მონიშნულ ნაწილს

დასკვნა.

მხოლოდ პროგრამირების შესწავლა საკმარისი არაა, ასევე აუცილებელია გამოვიყენოთ ჩვენი სამუშაო ხელსაწყოების მაქსიმუმი.

მოცემულ ბლოგში, შევეცადე გამეზიარებინა ჩემს მიერ ყველაზე ხშირად გამოყენებული ღილაკის კომბინაციები, რომლებიც დეველოპმენტის პროცესს ბევრად მოსახერხებელს ხდის.

იმისთვის, რომ გახდეთ უკეთესი პროგრამისტი, აუცილებელია ნელ-ნელა ისწავლოთ იმ ტექსტური რედაქტორის გამოყენება, რომელშიც საკმაოდ დიდ დროს ვატარებთ.

პროგრამირება არის ერთ-ერთი ყველაზე დინამიური და განვითარებადი სფერო მსოფლიოში, მაგრამ მას ხშირად თან ახლავს მითები და არასწორი წარმოდგენები.

ამ მითებმა, შეიძლება ადამინები, რომლებიც ფიქრობენ პროგრამირების შესწავლის დაწყებას, შეცდომაში შეიყვანოს და არასწორი წარმოდგენა შეუქმნათ ამ სფეროზე.

დღევანდელ ბლოგში ვეცდები განვიხილო ტოპ 10 ყველაზე გავრცელებული მითი პროგრამირებაზე.

უმაღლესი მათემატიკის ცოდნა.

პირველ ადგილას, შეიძლება დავაყენოთ მითი მათემატიკის ცოდნასთან დაკავშირებით. ძალიან ბევრს გონია, რომ უმაღლესი მათემატიკის ცოდნის გარეშე პროგრამირებას ვერ შეისწავლიან.

რეალურად ეს სულაც არაა საჭირო იმისთვის, რომ პროგრამირება ისწავლოთ. ამ სფეროში ერთ-ერთი ყველაზე მთავარი უნარია შეგეძლოთ ლოგიკური აზროვნება.

რა თქმა უნდა არის სფეროები სადაც უმაღლესი მათემატიკის ცოდნა აუცილებელია, მაგრამ ეს არ ნიშნავს, რომ მისი ცოდნის გარეშე სამსახურს ვერ მოძებნით.

ძლიერი კომპიუტერი.

ბევრს გონია, რომ პროგრამირების შესწავლას ვერ დაიწყებ, თუ არ გაქვს საკმაოდ ძლიერი კომპიუტერი, რომლის შეძენაც რა თქმა უნდა დიდ ხარჯებთანაც შეიძლება იყოს დაკავშირებული.

როგორც ჩემს ერთ-ერთ ბლოგში ავღნიშნე, თქვენ შეგიძლიათ პროგრამირების შესწავლა საკმაოდ ბიუჯეტურ კომპიუტერზეც კი.

მთავარია კომპიუტერს შეეძლოს ბრაუზერის და VS Code-ის გახსნა, რომელიც საკმაოდ მსუბუქ ტექსტურ რედაქტორს წარმოადგენს.

პროგრამირების შესწავლა დღეში 1-2 საათით.

და აი მივადექით მითს, რომელიც ყველაზე გავრცელებული მითია ბოლო წლების განმავლობაში, რა თქმა უნდა, აქაც აკადემიების მარკეტინგულ ხრიკებს უნდა ვუმადლოდეთ.

ბევრი ფიქრობს, რომ პროგრამირების შესწავლა დღეში 1-2 საათში შესაძლებელია, მაგრამ სინამდვილეში, ეს დრო ხშირად არც კი იხარჯება ყოველდღიურად და მაქსიმუმ კვირაში 2-3 დღეა.

თუ თქვენ ნამდვილად გადაწყვიტეთ ამ საქმეს სერიოზულად მოეკიდოთ მოგიწევთ თქვენი თავისუფალი დროის მაქსიმუმი დაუთმოთ, ვინაიდან უამრავი მასალის შესწავლა მოგიწევთ, ასევე აუცილებელია თეორიულ ცოდნასთან ერთად ეს ყველაფერი პრაქტიკული პროექტებითაც გაამყაროთ.

სწავლის დამთავრება კურსის შემდგომ.

საკმაოდ ბევრ ადამიანს სჯერა, რომ უნივერსიტეტის დამთავრების თუ კურსის გავლის შემდგომ პროგრამირების შესწავლაც დასრულდება, დაიწყებენ თავისთვის საოცნებო სამსახურს და მორჩა.

რეალურად პროგრამირების შესწავლა არასდროს დასრულდება, ვინაიდან ეს სფერო საკმაოდ დინამიურია და ყოველდღიურად ვითარდება. იმისთვის, რომ დარჩეთ კომპეტენტური აუცილებელია ყოველდღიური სწავლა და ფეხის აწყობა ახალ ტექნოლოგიებზე, წინააღმდეგ შემთხვევაში დიდი შანსია სამსახურიც დაკარგოთ.

პროგრამირება მხოლოდ კაცებისთვისაა.

ჩემი გამოცდილებიდან ბევრს აქვს არასწორი შეხედულება, რომ ეს სფერო მხოლოდ მამაკაცებისთვისაა, არ ვიცი მითი საიდან გაჩნდა, მაგრამ ფაქტია თუნდაც ჩემი არხის მაყურებლების 98% მამაკაცებს წარმოადგენენ.

პროგრამირება არის ყველასთვის განურჩევლად სქესისა, თქვენ წარმოიდგინეთ ისტორიულად პირველი პროგრამისტი ზუსტადაც ქალი იყო.

პროგრამირების შესასწაცლად თქვენ უბრალოდ მონდომება გჭირდებათ.

პროგრამირება გენიოსებისთვისაა.

საკმოდ ბევრჯერ მაქვს მოსმენილი ფრაზა, “მაგას მე ვერ ვისწავლი, პროგრამირება გენიოსებისთვისაა”.

რა თქმა უნდა ყველა სფეროში არიან გენიოსები, ზოგი სწრაფად ითვისებს, ზოგს მართლა თანდაყოლილი ნიჭი აქვს, მაგრამ მინდა გითხრათ, პროგრამირების სწავლა ყველას შეუძლია, მთავარია მონდომება და საკუთარ თავზე მუშაობა.

გახსოვდეთ პროფესიონალად ვერ ჩამოყალიბდებით, თუ საკმარის დროს და ენერგიას არ ჩადებთ, ყოველდღიური მუშაობით და პრაქტიკით შესაძლებელია საკმაოდ კარგი პროფესიონალი გახდეთ.

მალე გამდიდრება.

ყველას სმენია თუ რა კარგი ანაზღაურება აქვთ პროგრამისტებს, სწორედ ესაა უმეტეს შემთხვევაში მიზეზი თუ რატომაც ინტერესდებიან ამ სფეროთი.
დიახ კარგ პროგრამისტს კარგი ანაზღაურება აქვს, მაგრამ მინდა გაიზროთ თუ რამდენი შრომა დგას ამ ანაზღაურების უკან.

ვერ იქნება რეალისტური, რომ 1-2 წელიწადში მაღალი ანაზღაურება გქონდეთ. მხოლოდ კურსების გავლა და რამდენიმე პროექტის გაკეთება საკმარისი არ არის იმ ცოდნის მისაღებად, რომელიც ბაზარზე ძვირად ფასობს. კარგი ანაზღაურების მისაღწევად საჭიროა დიდი შრომა, დრო და რესურსების ჩადება.

პროგრამისტები ინტროვერტები არიან.

ჰოლივუდის უამრავი ფილმის გახსენება შეიძლება სადაც პროგრამისტები ძირითადად ინტროვერტები არიან, სადღაც სარდაფში სხედან და კონტაქტი არავისთან არ აქვთ.

მინდა გითხრათ, რომ გამონაკლისები ყველგან არიან, მაგრამ ეს არის სფერო, რომელიც გუნდურ მუშაობას მოითხოვს, ჩემი კარიერის განმავლობაში საკმაოდ ბევრ პროგრამისტს შეხვედრილვარ, საიდანაც ინტროვერტი ალბათ 1-2 თუ იყო.

ასე, რომ ნუ გექნებათ არასწორი წარმოდგენა პროგრამისტებზე, ჩვენც ისევე მოგვწონს ადამიანებთან კომუნიკაციის დამყარება როგორც სხვებს.

AI ჩაანაცვლებს პროგრამისტებს.

და აი მივადექით ერთ-ერთ ყვეალზე სადაო თემას, ჩაანაცვლებს თუ არა ხელოვნური ინტელექტი პროგრამისტებს.

მინდა გითხრათ, რომ ეს ჯერ კიდევ დავის საგანია თუნდაც უამრავ პროგრამისტში, მაგრამ მე ჩემი აზრი შემიძლია მოგახსენოთ.

ხელოვნური ინტელექტი საკმაოდ კარგი ხელსაწყოა, რომელიც რუტინულ საქმეებს აგვარიდებს თავიდან, მაგრამ არ მგონია ადამიანის კრეატიულობა და პრობლემბის გადაჭრის უნარები მთლიანად ჩანაცვლდეს პროექტებში რომლებიც თუნდაც ადამიანურ გამოცდილებას მოითხოვს.

რა თქმა უნდა ამ სფეროზე საუბარი უსასრულოდ შეიძლება, მაგრამ ჯობია აქ დავასრულო ჩემი აზრი.

აუცილებელია ყველა ენის შესწავლა.

ძირითადად დამწყებ პროგრამისტებში ხშირია არასწორი შეხედულება იმის შესახებ, რომ პროფესიონალად ჩამოყალიბებაში აუცილებელია ყველა პროგრამირების ენის შესწავლა.

რა თქმა უნდა ყოველთვის უნდა ცადოთ ახალი ტექნოლოგია თუ პროგრამირების ენა, მაგრამ ეს არ ნიშნავს იმას, რომ არ იქნებით კარგი პროფესიონალი თუ ყველაფერი არ გეცოდინებათ.

მინდა გითხრათ, რომ შესაძლებელია მთელი კარიერის განმავლობაში ერთ ენაზე წეროთ და თქვენი ანაზღაურება საკმაოდ კოლოსალური თანხა იყოს.

მთავარია იყოთ კარგი პროფესიონალი.

დასკვნა.

მოცემულ ბლოგში ვეცადე ჩამომეთვალა ჩემს გარშემო ყველაზე გავრცელებული მითები პროგრამირებაზე, თუ დაამატებდით რამეს შეგიძლიათ მოიწეროთ ჩვენი ტელეგრამის ჯგუფში და ვისაუბროთ.

მოგესალმებით! დღევანდელ ბლოგში შევეცდები ვისაუბრო ტოპ 10 მიზეზზე, თუ რატომ უნდა ისწავლოთ ვებ დეველოპმენტი.

სანამ ბლოგის კითხვას გააგრძელებთ, მინდა ავღნიშნო, რომ მოცემული მიზეზები, არის ჩემი სუბიექტური აზრი, რომელსაც შესაძლოა თქვენ არ ეთანხმებოდეთ.

თუ ფიქრობთ რომელიმე მიზეზის ამოღებას და სხვა მიზეზით ჩანაცვლებას, შეგიძლიათ მომწეროთ val-do.com-ის ტელეგრამ ჯგუფში.

1. სწავლის დაწყება ფინანსების გარეშე.

პირველ და ყველაზე მარტივ მიზეზად, შემიძლია დავასახელო სწავლის დაწყება ყოველგვარი ფინანსური ინვესტიციის გარეშე, საკმარისია მხოლოდ პერსონალური კომპიუტერის ქონა.

თქვენ მარტივად შეგიძლიათ უფასო რესურსებით დაიწყოთ, მაგალითად youtube.com-ზე ან თუნდაც val-do.com-ზე არსებული უამრავი ვიდეო გაკვეთილით.

სწავლის დასაწყებად მთავარია თქვენი მონდომება.

2. სამსახურის დასაწყებად არ გჭირდებათ დიპლომი.

პროგრამირების შესწავლა შესაძლებელია სახლიდან გაუსვლელად, ასევე არ აქვს მნიშვნელობა თუ რა ასაკის ხართ, პირადად მე, მქონია შემთხვევები როდესაც დეველოპმენტის სწავლა 45 წლის ადამიანს უფრო კარგად გამოსდიოდა, ვიდრე 21 წლის ადამიანს.

მოცემული სფერო, საშუალებას გაძლევთ შეისწავლოთ და მარტივად დასაქმდეთ მაღალ ანაზღაურებად სამსახურში, ან დაიწყოთ თქვენი პირველი ციფრული სტარტაპი, უნივერსიტეტის დიპლომის გარეშე.

3. მოქნილი სამუშაო გრაფიკი.

როდესაც ხართ პროგრამისტი, გაქვთ სასურველი სამსახურის არჩევის დიდი შესაძლებლობა, თქვენ შეგიძლიათ იპოვოთ სამსახური, რომელიც არ მოითხოვს თქვენს ყოველდღიურ სიარულს ფიზიკურ ოფისში.

თუ თქვენ გადაწყვეტთ თქვენი კარიერა ე.წ. ფრილანსერის გზით განავითაროთ, შეძლებთ იმუშაოთ მხოლოდ მაშინ, როდესაც თქვენ მოგესურვებათ.

4. საინტერესო საქმე.

მას შემდეგ რაც პირველ ნაბიჯებს გადადგამთ, მიხვდებით თუ რამდენად საინტერესოა. პროგრამირება გაძლევთ შესაძლებლობას გაუმკლავდეთ რთულ გამოწვევებს და გადაჭრათ სირთულეები.

კოდის წერა შემოქმედებითი პროცესია, რომლის დახმარებითაც შეგიძლიათ შექმნათ და ფრთები შეასხათ თქვენს იდეებს.

უნიკალური სიამოვნებაა, როდესაც ცარიელი ფურცლიდან იწყებთ და ქმნით ისეთ პროდუქტს, რომელიც სხვა ადამიანებს გაუმარტივებს ცხოვრებას.

5. მომავლის პროფესია.

ციფურლ სამყაროში, ყოველდღიურად იზრდება ვებ საიტების დამზადების და დეველოპმენტის საჭიროება, ალბათ დღეს რთულად წარმოსადგენია ბიზნესი, რომელსაც არ აქვს თავისი ვებსაიტი.

რაც დრო გადის, მით მეტად იზრდება მოთხოვნა პროგრამისტებზე, შესაბამისად არ იდარდებთ იმაზე, რომ ეს პროფესია მალე გახდება ჩამოსაწერი.

ასევე მინდა ავღნიშნო, რომ საკმაოდ ბევრ ადამიანს აშინებს ხელოვნური ინტელექტი და თვლის, რომ ამ პროფესიას მალე ჩაანაცვლებს, მაგრამ მინდა განუგეშოთ.

ხელოვნური ინტელექტი არის ხელსაწყო, რომელიც დაგვეხმარება უფრო კარგ პფოფესიონალებად ჩამოყალიბებაში და რუტინული საქმეებისგან თავის არიდებაში.

6. მარტივი შესასწავლად.

იმ შემთხვევაში, თუ პროგრამირების სწავლას საფუძვლებით დაიწყებთ, შესწავლა მარტივია. ყველაზე დიდი გამოწვევა არის მოთმინება.

პროგრამირების სწავლისას, ნასწავლი მასალის პრაქიკაში გამოყენება გვაძლევს საშუალებას, სიღრმისეულად გავიაზროთ განვლილი მასალა.

სწავლისას, მთავარია ყველაფერი საფუძვლიანად გავიაზროთ და არ გამოვტოვოთ ფუნდამენტური საკითხები.

7. საერთაშორისო ბაზარზე მუშაობის შესაძლებლობა.

წარმოიდგინეთ, შეგიძლია საქართველოდან იმუშავო მსოფლიოს ნებისმიერ კუთხეში, შენ უბრალოდ გჭირდება კომპიუტერი და ინტერნეტი.

არის უამრავი საიტები, რომლებიც დაგვეხმარება სამსახურის მოძიებაში საერთაშორისო ბაზარზე, მაგრამ არ მინდა არასწორი მოლოდინები გქონდეთ,

პირველი სამსახურის დაწყება საკმაოდ რთულია და თქვენგან დიდ მოთმინებას მოითხოვს.

8. მაღალი ანაზღაურება.

დარწმუნებული ვარ, ერთხელ მაინც გსმენიათ იმ მაღალ ანაზღაურებაზე, რომელიც პროგრამისტებს აქვთ. მართლაც, კარგ პროგრამისტს ნამდვილად კარგი შემოსავალი აქვს. 

მთავარია არ შეგვექმნას არასწორი წარმოდგენა, რომ კარგი ანაზღაურება მარტივად მოდის, ეს თქვენგან უდიდესი შრომის და დროის ჩადებას მოითხოვს.

9. თვით განვითარება.

პროგრამირება საშუალებას გვაძლევს ყოველდღიურად განვვითარდეთ, რადგან ეს სფერო ძალიან სწრაფად იცვლება. 

სიახლეების გათავისება გვაიძულებს მუდმივ განვითარებას, რაც გვეხმარება პრობლემების გადაჭრის ახალი მეთოდების დამუშავებაში და ჩვენი გონების აქტიურობის შენარჩუნებაში.

10. პრობლემების გადაჭრის უნარის გამომუშავება.

პროგრამირება გაძლევს საშუალებას გამოიმუშავოთ პრობლემის გადაჭრის უნარი ცივი გონებით. 

შენ გამოიმუშავებ უნარს, რთული კომპლექსური პრობლემები დაშალო მარტივ პრობლემებად და გადაჭრა ისინი ნაბიჯ-ნაბიჯ.

გარდა პროფესიისა ეს უნარები პირად ცხოვრებაშიც ძალიან კარგად წაგადგებათ.

დასკვნა.

ზემოთ ვეცადე ჩამომეთვალა ჩემი აზრით ტოპ 10 მიზეზი იმისა, თუ რატომ უნდა დაიწყოთ პროგრამირების შესწავლა დღეს.

მიუხედავათ ამ მიმზიდველი ბენეფიტებისა, მინდა არ შეხვიდეთ შეცდომაში და არ შეგექმნათ არასწორი წარმოდგენები, იმის შესახებ რომ, პროგრამისტად ჩამოყალიბება მარტივი შრომით არის შესაძლებელი.

პროგრამირების შესასწავლად საკმაოდ რთული გზა გაქვთ გასავლელი, რომელიც ნამდვილად არაა ერთ ორ დღეში შესწავლადი.

მინდა კარგად გახსოვდეთ და გაიაზროთ, რომ ამ სფეროს შესწავლას სჭირდება დიდი მოთმინება და თადაუზოგავი შრომა, გახსოვდეთ, პირველი სამსახურის დაწყება ყველაზე რთულია.

ასევე შეგიძლიათ გაეცნოთ ჩემს ბლოგს, რომელშიც ვისაუბრე ტოპ 10 მიზზეზე, თუ რატომ ანებებენ ადამიანები პროგრამირების სწავლას თავს.

მოგესალმებით, დღევანდელ ბლოგში შევეცდები მოკლედ განვიხილო მიზეზები, თუ რატომ ანებებენ ადამიანები პროგრამირების სწავლას თავს.

ვეცდები მოკლედ მიმოვიხილო სწავლის დანებების ტოპ 10 მიზეზი.

---

1. მოთმინების ნაკლებობა.

ბევრი ფიქრობს, რომ პროგრამირების შესწავლა მარტივი და სწრაფი პროცესია. თუმცა რეალობა სხვაგვარია - ეს ძალიან დიდ დროს და პრაქტიკას მოითხოვს.

ხშირად ადამიანებს, თუნდაც სხვადასხვა აკადემიის რეკლამებიდან, მცდარი მოლოდინები უჩნდებათ პროგრამირების შესწავლის მიმართ, როგორც წესი, შედეგს რამდენიმე თვეში ელოდებიან, მაგრამ როდესაც რეალობას ეჯახებიან, მოტივაციაც მარტივად იკარგება.

2. სირთულის შეგრძნება.

ხანდახან არის მომენტები როდესაც მოთმინების ნაკლებობა არაა პრობლემა, მაგრამ პროგრამირების შესწავლისას, უნდა გვახსოვდეს, რომ ეს საკმაოდ დიდი და კომპლექსური სფეროა, როდესაც ნელ-ნელა გამორკვევას ცდილობთ, საკმაოდ დიდი თავსატეხი ჩნდება - როგორ ავითვისებ ამდენ მასალას?

სწორედ ამ დროს ბევრი ნებდება და გონია, რომ ამას ვერ შეძლებს, არადა არც ისე რთულია თუ საფუძვლებით დაიწყებთ და მყისიერად დიდ და რთულ პროექტებს არ შეეჭიდებით.

3. არარეალური მოლოდინები.

საკვირველია, მაგრამ ფაქტია, რომ ადამიანების დიდ ნაწილს, რომლებიც პროგრამირების სწავლას გადაწყვეტენ, აქვთ მოლოდინი, რომ დღეში რამოდენიმე საათით პროგრამისტები გახდებიან და მალვევე ექნებათ მაღალი ხელფასი.

როგორც ზემოთ ავღნიშნე ამ მოლოდინების წარმოქმნაში სასწავლო აკადემიების მარკეტინგულ ხრიკებასაც დიდი გავლენა აქვთ.

პროგრამისტად ჩამოყალიბებისთვის საკმაოდ დიდი გზაა გასავლელი და როდესაც მოლოდინები რეალობას არ ემთხვევა მოტივაცია მარტივად ქრება.

4. წარუმატებლობის შიში.

პროგრამირების სწავლის პროცესში შეცდომების დაშვება ჩვეულებრივი მოვლენაა, მაგრამ ამას ზოგი ისე იღებს თითქოს ეს სფერო მისთვის არაა და გონია ამ შეცდომებს არ უნდა უშვებდეს.

სწორედ ეს ხდება ზედმეტი თვითკრიტიკის მიზეზი და ადამიანები არწმუნებენ თავს, რომ მათ ეს არ გამოუვათ.

მინდა დაგამშვიდოთ და გითხრათ, რომ შეცდომებს ყველაზე გამოცდილი პროგრამისტებიც ათასობით უშვებენ, შეცდომების დაშვება ჩვეულებრივი მოვლენაა, სწორედ ამ შეცდომების გამოსწორებისას და გააზრებისას სწავლობთ პროგრამირებას სიღრმისეულად, მთავარია არ დანებდეთ.

5. მკაფიო მიზნის არ ქონა.

არის მომენტები, როდესაც პროგრამირების სწავლა მეგობრის რჩევით გადაწყვიტეთ, მაგრამ, არ გაქვთ გააზრებული თუ სად ხედავთ თავს მომავალში, პროგრამირებას უამრავი მიმართულება აქვს, მაგალითად Frontend, Backend, DevOps და კიდევ მრავალი, თავად ეს მიმართულებებიც ასობით შეგვიძლია ჩავშალოთ.

სანამ ამ სფეროში ფეხის შემოდგმას გადაწყვეტთ, ჯობს კარგად გაარკვიოთ თუ რა გაინტერესებთ, მოუსმინოთ იუთუბზე, წაიკითხოთ ბლოგები და კარგად გამოარკვიოთ, რომელი მიმართულებით განავითაროთ თქვენი კარიერა.

როდესაც არ გაქვთ მიზანი, სწავლაც უაზროდ გეჩვენებათ.

6. პრაქტიკის ნაკლებობა.

საკმაოდ ბევრ სტუდენტს შევხვედრილვარ და მათთან საუბარში გამომირკვევია მათი მოლოდინები, რომ როდესაც რაიმე ვიდეო კურსს გაივლიან და რამდენიმე პროექტს გააკეთებენ, ექმნებათ წარმოდგენა, რომ ეს საკმარისია და უკვე სამსახურიც მალევე უნდა დაიწყონ.

მხოლოდ ვიდეობის ყურება, წიგნების კითხვა საკმარისი არ არის. თუ ყოველდღიურად არ დაიწყებთ კოდის წერას, ვერ იგრძნობთ, როგორ უნდა გამოიყენოთ განვლილი ვიდეო გაკვეთილის მასალა პრაქტიკაში.

7. სხვებთან შედარება.

ბევრი დამწყები საკუთარ თავს შედარებას უკეთებს გამოცდილ პროგრამისტებთან და იმედგაცრუებული რჩებიან, იმით, რომ მათ ისევე მარტივად არ ესმით კონკრეტული თემა ჯავასკრიპტში ან ნებისმიერ ენაში, როგორც გამოცდილებს.

გახსოვდეთ, სწავლის ტემპი ყველას სხვადასხვა აქვს, არასდროს არ შეადაროთ თქვენი თავი სხვას, დაისახეთ თქვენი მიზანი და მიყევით მანამ, სანამ შედეგს არ მიაღწევთ.

8. ინტერესის ნაკლებობა.

ზოგიერთი ადამიანი იწყებს პროგრამირების სწავლას მხოლოდ იმიტომ, რომ ეს “მოდაშია” ან მაღალი ანაზღაურება მოსწონს, რომელიც მეგობარმა ურჩია. თუმცა, თუ რეალურად არ გაინტერესებთ, დიდი შანსია, მალე დანებდეთ.

მინდა გირჩიოთ, სანამ რაიმე კურსის შეძენას გადაწყვეტთ მოიძიეთ მეტი ინფორმაცია, თუ რა დროის და შრომის რესურსის ჩადებას მოითხოვს ეს პროფესია თქვენგან, იმ შემთხვევაში თუ მზად იქნებით დიდი შანსია გამოგივიდეთ.

9. ცუდი სასწავლო რესურსები.

თუ მოძველებულ ან რთულად გასაგებ მასალებს იყენებთ, სწავლა უფრო დამღლელი და ნაკლებად საინტერესო ხდება.

ეცადეთ მოიძიოთ მეგობრებისგან თუ, რომელი კურსის გავლა სჯობს და რატომ, დაპოსტეთ შესაბამის ჯგუფებში, რათა რეალური პიროვნებებისგან გაარკვიოთ ამა თუ იმ კურსის ხარისხი.

გახსოვდეთ ყველა ადამიანი ინდივიდუალაურად ითვისებს ახსნილ მასალას, არ ჩაიქნიოთ ხელი თუ რომელიმე კურსის ავტორის ახსნის სტილი თქვენ არ მოგერგებათ, ნახეთ სხვა კურსი, რომელიც თქვენთვის მეტად გასაგები და საინტერესო იქნება.

10. მხარდაჭერის არარსებობა.

თუ თქვენთან არ არიან ადამიანები, ვინც დაგეხმარებათ ან გაგიზიარებენ გამოცდილებას, სწავლა რთულდება და მოტივაცია იკლებს.

ეცადეთ მოძებნოთ ისეთი ჯგუფები, სადაც თქვენნაირი დამწყებები არიან, რომლებიც თქვენნაირ პრობლემას ყოველდღიურად აწყდებიან, ეს დაგეხმარებათ იმის გააზრებაში, რომ მარტო არ ხართ, შესაბამისად მეტი შანსია არ გაჩერდეთ და წინსვლა გააგრძელოთ.

---

დასკვნა.

ეს იყო ის 10 მიზეზი, რის გამოც ადამიანები ხშირად ანებებენ პროგრამირების სწავლას. გახსოვდეთ, ყველა პრობლემის გადაწყვეტა შესაძლებელია. დასახეთ პატარა მიზნები, გადადგით ყოველდღიური ნაბიჯები და არ შეადაროთ საკუთარი თავი სხვებს. წარმატებას დროთა განმავლობაში მიაღწევთ.

როგორც val-do.com-ზე არსებული ჯავასკრიპტის კურსიდან ვისწავლეთ, ობიექტის თვისებების მნიშვნელობის წვოდმა შესაძლებელია 2 გზით, წერტილით და კვადრატული ფრჩხილებით.

მაგალითი:

const user = { name: "Val Do" };

console.log(user.name); // დაიბეჭდება Val Do
console.log(user["name"]; // დაიბეჭდება Val Do

მოცემულ ბლოგში, ვეცდები მარტივი მაგალითებით ავხსნა ამ ორ მეთოდს შორის რა სხვაობებია და რომელი მეთოდით ჯობს მივწვდეთ სასურველი ობიექტის მნიშვნელობებს.

წერტილით წვდომა (Dot Notation).

სინტაქსი: object.property

ობიექტის თვისებაზე წერტილით წვდომა სასურველია მაშინ, როდესაც თვისება წარმოადგენს ჯავასკრიპიტს სწორ მნიშნველობას, ანუ არ შეიცავს სიცარიელეს (white spaces), არ იწყება რიცხვითი მნიშვნელობით, არ არის ე.წ. დარეზერვებული საკვანძო სიტყვა (keyword).

ასევე წერტილით წვდომა სასურველია იმ შემთვევაში თუ დარწმუნებული ვართ ობიექტის სტატიკურ მნიშნველობაში.

მაგალითი:

const obj = { name: 'John' };
console.log(obj.name); // დაიბეჭდება: John

---

კვადრატული ფრჩხილებით წვდომა (Square Brackets Notation)

სინტაქსი: object["property"]

წერტილის წვდომისგან განსხვავებით ფრჩხილებით წვდომა გვაძლევს საშუალებას მივწვდეთ ისეთ ობიექტებს, რომლებიც გენერირებულია დინამიურად და შეიცავს სპეციალურ სიმბოლოებს, ისეთებს, როგორებიცაა სიცარიეელები (white spaces), რიცხვითი მნიშნველობით დაწყებული თვისების სახელები და ასევე დარეზერვებული სიტყვები.

ქვემოთ მოცემულია ობიექტზე წვდომის მაგალითები კვადრატული ფრიჩხილების გამოყენებით

მაგალითი 1: დინამიური წვდომა

const key = 'name';
const obj = { name: 'John' };
console.log(obj[key]); // დაიბეჭდება: John

მაგალითი 2: ობიექტზე წვდომა, რომელის თვისებაც შეიცავს სიცარიელეს

const obj = { 
    'first name': 'John',
    age: 30
};
console.log(obj['first name']); // დაიბეჭდება: John

მაგალითი 3: ობიექტზე წვდომა, რომლის თვისებაც იწყება რიცხვითი მნიშვნელობით

const obj = { '123abc': 'value' };
console.log(obj['123abc']); // დაიბეჭდება: value

---

რომელი წვდომის მეთოდი გამოვიყენოთ ობეიქტებისთვის?

• წერტილის ნოტაცია გამოიყენეთ ყოველთვის, როდესაც ეს შესაძლებელია, რადგან ის უფრო სუფთა და მარტივი წასაკითხია.
• ფრჩხილების ნოტაცია გამოიყენეთ, როდესაც:
  • გაქვთ დინამიური მახასიათებლის სახელი.
  • მახასიათებლის სახელი შეიცავს სპეციალურ სიმბოლოებს, სპეისებს ან იწყება რიცხვით.

თუ მოგეწონათ ეს ბლოგი, გთხოვთ, გააზიაროთ ის თქვენს სოციალურ ქსელებში, რათა უფრო მეტ ადამიანს მიაწვდინოთ ეს ინფორმაცია. ასევე, თუ გსურთ, შეგიძლიათ შემომწირველობით მხარი დაუჭიროთ ჩემს შრომას და დაეხმაროთ ახალი და საინტერესო კონტენტის შექმნაში. თქვენი მხარდაჭერა ჩემთვის ძალიან მნიშვნელოვანი და დასაფასებელია!

პროგრამირებაში ერთ-ერთი მთავარი მცნებაა Garbage collector (GC) (ნაგვის შეგროვება) რაც გულისხმობს კომპიუტერის მეხსიერების მენეჯმენტს.

მოცემული მექანიზმი JavaScript-ში უზრუნველყოფს კომპიუტერის მეხსიერების ავტომატურ გასუფთავებას ისეთი ცვლადების მნიშვნელობებისგან, რომელიც აღარაა საჭირო პროგრამის ფუნქციონირებისთვის.

პროგრამირების ზოგიერთ ენაში მაგალითად როგორიცაა დაბალი დონის ენები, აუცილებელია მსგავსი ოპერაციის პოროგრამისტის მიერ მენეჯმენტი, რაც შეეხება JavaScript-ს აქ მეხსიერების გასუფთავება ხდება ავტომატურად.

აუცილებელია გვქონდეს კარგი წარმოდეგენა თუ როგორ მუშაობს ჯავასკრიპტის Garbage collection, რათა ავიცილოთ მეხსიერების გაჟონვები (memory leaks).

მეხსიერების გამოყოფა (Allocation in JavaScript)

ჯავასკრიპტი ავტომატოურად გამოყოფს მეხსიერებას მაშინ, როდესაც ჩვენ ახალ ცვლადს, ფუნქციას, ან ობიექტს ვანიჭებთ მნიშვნელობას

const x = 456; // გამოყოფს მეხსიერებას რიცხვისთვის
const t = "ტექსტი"; // გამოყოფს მეხსიერებას სტრინგისთვის

const obj = {
  c: 2,
  d: null,
}; // გამოყოფს მეხსიერებას ობიექტისთვის და მასში არსებული მნიშვნელობებისთვის

// გამოყოფს მეხსიერებას მასივისთვის და მასში არსებული მნიშვნელობებისთვის
const arr = [2, null, "ტექსტი2"];

function g(c) {
  return c * 3;
}

someElement.addEventListener(
  "click",
  () => {
    someElement.style.backgroundColor = "red";
  },
  false,
);

მეხსიერების გამოყოფა ფუნქციის გამოძახებით

ზოგიერთი ფუნქციის გამოძახება გამოყოფს მეხსიერებას

const t = new Date(); // გამოყოფს Date ობიექტს
const el = document.createElement("span"); // გამოყოფს DOM ელემენტს

ასევე ზოგიერთი მეთოდის გამოყენებით

const str = "ტექსტი";
const str2 = str.substr(0, 4); // str2 არის ახალი სტრინგი

const arr1 = ["დიახ დიახ", "არა არა"];
const arr2 = ["გენერაცია", "არა არა"];
const arr3 = arr1.concat(arr2);
// ახალი მასივი 4 ელემენტით,
// რომელიც წარმოადგენს arr1 და arr2 ელემენტების გაერთიანებას.

მეხსიერების გათავისუფლება, როდესაც ის აღარ არის საჭირო

მეხსიერების მართვის პრობლემების უმეტესობა სწორედ ამ ეტაპზე ხდება. ყველაზე რთული ამოცანაა განსაზღვრა, როდის აღარ არის საჭირო გამოყოფილი მეხსიერება.

დაბალი დონის ენებში პროგრამისტმა უნდა განსაზღვროს, პროგრამის რომელ ეტაპზე აღარ არის საჭირო მეხსიერება და გაათავისუფლოს იგი.

მაღალი დონის ზოგიერთი ენა, როგორიცაა JavaScript, იყენებს ავტომატური მეხსიერების მართვის მექანიზმს, რომელიც ცნობილია როგორც ნაგვის შემგროვებელი (Garbage Collector - GC). ნაგვის შემგროვებლის მიზანია მეხსიერების მონიტორინგი, განსაზღვრა, როდის აღარ არის საჭირო გამოყოფილი მეხსიერების ბლოკი და მისი დაბრუნება.

როგორც იქნა საბოლოოდ დავემშვიდობე Windows ოპერაციულ სისტემას და სამუშაო პერსონალური კომპიუტერი Mac mini M2 სისტემით ამოვცვალე, ასევე ლეპტოპიც Macbook მაქვს, დღევანდელ ბლოგში მოგიყვებით თუ როგორ გავმართე ლოკალური ვებსერვერი nginx-ით.

Homebrew-ს ინსტალაცია

სანამ nginx-ის ინსტალაციას დავიწყებთ აუცილებელია მაკზე დავაყენოთ ე.წ. package manager სახელად homebrew, რომელიც საშუალებას გვაძლევს terminal-ის დახმარებით დავაინსტალიროთ როგორც nginx ასევე სხვა მრავალი აპლიკაცია.

Homebrew-ს ინსტალაციისთვის უბრალოდ საჭიროა გადავიდეთ მოცემულ ბმულზე და მივყვეთ ინსტრუქციას ან უბრალოდ ჩვენს ტერმინალში ჩავწეროთ მოცემული ბრძანება sudo პრივილეგიით

sudo /bin/bash -c "$(curl -fsSL https://raw.githubusercontent.com/Homebrew/install/HEAD/install.sh)"

Nginx-ის ინსტალაცია

მას შემდეგ რაც Homebrew-ს დავაყენებთ, terminal-ის დახმარებით მარტივად ერთი ბრძანებით შეგვიძლია nginx-ის ინსტალაცია.

ინსტალაციისთვის ტერმინალში უნდა ჩავწეროთ შემდეგი ბრძანება

brew install nginx

მოცემული ბრძანება დააინსტალირებს nginx-ს და უკვე საშუალება გვაქვს მისი გამოყენების

Nginx-ის გაშვება, გადატვირთვა

ინსტალაციის შემდგომ აუცილებელია nginx-ის სერვისის გაშვება, რომელიც შეგვიძლია გავუშვათ შემდეგი ბრძანებით

brew services start nginx

მას შემდეგ რაც სერვისი გაეშვება ჩვენ უკვე შეგვიძლია sudo პრივილეგიით nginx-ის რესტარტი, იმ შემთხვევებისთვის თუ კონფიგურაციის ფაილის შეცვლა მოვახდინეთ

sudo nginx -s reload

Nginx-ის კონფიგურაციის მისამართი

nginx-ის კონფიგურაციის მისამართია:

/opt/homebrew/etc/nginx

რა თქმა უნდა ე.წ. absolute path-ით

WWW დირექტორია

nginx-ის ინსტალაციის შემდგომ აუცილებელია გადამოწმება სწორად მუშაობს თუ არა ის. nginx ეშვება 8080 პორტზე შესაბამისად ბრაუზერში უნდა ჩავწეროთ შემდეგი მისამართი http://localhost:8080/ წარმატებით გახსნის შემდგომ გამოვა შესაბამისი შეტყობინება

დირექტორია, რომელსაც nginx უყურებს, ანუ სამუშაო ფაილები მდებარეობს შემდეგ მისამართზე: 

/opt/homebrew/var/www

(absolute path)

მოცემულ დირექტორიაში შეხვდებით ასევე nginx-ის ე.წ. welcome screen-ის html ფაილსაც.

ახალი პროექტის დამატება nginx ვებ სერვერზე

მას შემდეგ რაც დაამატებთ ახალ პროექტებს /opt/homebrew/var/www დირექტორიაში თქვენ უკვე შეგიძლიათ დაიწყოთ nginx-ის კონფიგურაციით მანიპულაცია თუ რომელ მისამართზე გაიხსნას თქვენი პროექტი.

რაც შეეხება nginx-ის კონფიგურაციებს ასევე შეგიძლიათ გაეცნოთ ჩემს ბლოგს შესაბამის ბმულზე

ტექნოლოგიისა და პროგრამირების სწრაფად განვითარებად სამყაროში, ინგლისურ ენაზე ეფექტური კომუნიკაცია სასიცოცხლოდ მნიშვნელოვანი გახდა.ინგლისური გაჩნდა, როგორც პროგრამირების სამყაროს ენა, რომელიც გადამწყვეტ როლს თამაშობს დეველოპერების კარიერის ჩამოყალიბებაში და გავლენას ახდენს პროექტების ტრაექტორიაზე. ამ სტატიაში ჩვენ განვიხილავთ ინგლისური ენის სწავლის მრავალმხრივ მნიშვნელობას მათთვის, ვინც ისწრაფვის პროგრამირების სფეროში წარმატებისკენ.

რატომ არის ინგლისური საჭირო ენა პროგრამირებირებისათვის?

თანამედროვე ტექნოლოგიები უფრო და უფრო დიდ ადგილს იკავებს  თანამედროვე მსოფლიოში  და ჩვენი ყოველდღიურობის ნაწილი ხდება.  მოთხოვნა ჩნდება პროგრამირების უნარებზე, არა მხოლოდ პროფესიული კუთხით, არამედ სხვადასხვა პროფესიებში პროგრამირების ელემენტების გამოყენებაზე.  პროგრამირება ხელს უწყობს ტექნოლოგიების, ავტომატიზაციისა და მონაცემთა ანალიზის გაუმჯობესებას.  პროგრამული უზრუნველყოფიდან -  ხელოვნური ინტელექტის გამოყენებამდე, პროგრამირება არის თანამედროვე ინოვაციების საყრდენი, რომელიც გავლენას ახდენს იმაზე, თუ როგორ ვმუშაობთ და ვმოძრაობთ მზარდ ციფრულ სამყაროში.

თუ პროგრამირების სწავლა ან ცოდნის გაუმჯობესება გადაწყვიტეთ, წარმატების მისაღწევად აუცილებლად დაგჭირდებათ ინგლისურის, როგორც საერთაშორისო ენის შესწავლა.
ინგლისური, როგორც პროგრამირების სამყაროს ენა, გადამწყვეტ როლს თამაშობს დეველოპერების კარიერის ჩამოყალიბებაში და გავლენას ახდენს პროექტების ტრაექტორიაზე. ამ სტატიაში ჩვენ განვიხილავთ ინგლისური ენის სწავლის მრავალმხრივ მნიშვნელობას მათთვის, ვინც ისწრაფვის პროგრამირების სფეროში წინსვლისკენ.

გლობალური თანამშრომლობა და საზოგადოების ჩართულობა

პროგრამირების ინგლისური ენის შესწავლის ერთ-ერთი ყველაზე დამაჯერებელი მიზეზი, პროგრამული უზრუნველყოფის განვითარებაა გლობალურ მსოფლიოში.  პროგრამირების ენები და ინფორმაცია საყოველთაოდ დოკუმენტირებულია ინგლისურ ენაზე. ეს სტანდარტიზაცია ხელს უწყობს თანამშრომლობას სხვადასხვა წარმოშობის დეველოპერებს შორის.

ღია კოდის პროექტები, რომლებიც ქმნიან პროგრამირების ხერხემალს, ხშირად ეყრდნობიან დეველოპერების წვლილს მთელ მსოფლიოში. ინგლისური ენის ცოდნა საშუალებას აძლევს პროგრამისტებს აქტიურად მიიღონ მონაწილეობა ამ პროექტებში, შეიტანონ წვლილი, განიხილონ საკითხები და ჩაერთონ შინაარსიან დისკუსიებში ღია კოდის საზოგადოებაში. ეს არა მხოლოდ აძლიერებს ინდივიდუალურ უნარებს, არამედ ამდიდრებს საერთო განვითარებას.

ვრცელ დოკუმენტაციასა და რესურსებზე წვდომა

ენის ძლიერი ცოდნა საშუალებას გაძლევთ შეისწავლოთ პროგრამირება ონლაინ რესურსების დახმარებით, რომლის მასალაც ძირითადად ინგლისურ ენაზეა. საერთაშორისო დოკუმენტაცია, რომელიც შესაძლოა თქვენს პროფესიაში დაგეხმაროთ ასევე ინგლიუსურ ენაზეა.  ინგლისურის სრულყოფილად ცოდნა დეველოპერებს  უმარტივებს დოკუმენტაციის თარგმნის პროცესს ზედმეტი ძალისხმევის გარეშე.  

გარდა ამისა, ონლაინ ფორუმები, ბლოგები და კოდირების თემები ძირითადად იყენებენ ინგლისურს, როგორც კომუნიკაციის საშუალებას. ამ პლატფორმებში ჩართვა პროგრამისტის სასწავლო პროცესის მნიშვნელოვანი ნაწილია.    პროგრამირების შესწავლა უფასოდ შეგიძლიათ  ისეთ ონლაინ კურსებზე და პროექტებზე როგორებიცაა: Codecademy, Udemy, Khan Academy, Code, FreeCodeCamp და სხვა.

სამუშაო შესაძლებლობები და კარიერული წინსვლა

ინგლისური ენის ცოდნა ხშირად წინაპირობაა პროგრამირების მრავალი სამუშაოსთვის, განსაკუთრებით მულტინაციონალურ კორპორაციებში ან კომპანიებში, რომლებსაც ყავთ გლობალური კლიენტურა. სამუშაოს აღწერილობა, გასაუბრება და ოფიციალური კომუნიკაცია ტექნიკურ ორგანიზაციებში ხშირად ტარდება ინგლისურ ენაზე. სამუშაოს მაძიებლებს, რომლებსაც აქვთ ინგლისური ენის  ცოდნა, აქვთ მკაფიო უპირატესობა კონკურენტულ სამუშაო ბაზარზე, რაც ხსნის კარიერული შესაძლებლობების უფრო ფართო სპექტრს.

უფრო მეტიც, დისტანციური მუშაობისა და გლობალური გუნდების ეპოქაში ინგლისური გამაერთიანებელი ენაა.  მიუხედავად იმისა, გუნდის წევრები განლაგებულნი არიან სხვადასხვა ქვეყანაში თუ დროის ზონაში, საერთო ენა ხელს უწყობს კომუნიკაციას და პროექტის ეფექტურ მენეჯმენტს.

მონაწილეობა ტექნიკურ კონფერენციებსა და ქსელურ ღონისძიებებში

ტექნიკური კონფერენციები და ღონისძიებები მნიშვნელოვან როლს თამაშობს პროგრამისტების პროფესიულ განვითარებაში. ეს შეკრებები საშუალებას გაძლევთ გაეცნოთ უახლესი ტექნოლოგიებს, დაუკავშირდეთ ინდუსტრიის ექსპერტებს და თანამოაზრე პროფესიონალებს. ინგლისური არის უპირატესი ენა, რომელიც გამოიყენება ამ ღონისძიებებში, ძირითადი პრეზენტაციებიდან ქსელის სესიებამდე.

დეველოპერებს, რომლებიც ფლობენ ინგლისურს, შეუძლიათ სრულად ჩაერთონ ამ კონფერენციებში, აქტიურად მიიღონ მონაწილეობა დისკუსიებში, დასვან კითხვები და დაამყარონ კავშირები ამ სფეროში გამოცდილ შემსრულებლებთან. ეს შესაძლებლობა გამოიწვევს ახალ თანამშრომლობასა და ახალ კარიერულ შესაძლებლობებს.

ღია კოდის და პროფესიული ქსელის აშენება

ღია კოდის პროექტებში მონაწილეობა ფანტასტიკური საშუალებაა პროგრამისტებისთვის, რათა დახვეწონ თავიანთი უნარები, მიიღონ რეალური გამოცდილება და შექმნან ძლიერი პროფესიული ქსელი. ვინაიდან ღია კოდის პროექტების უმეტესობა მუშაობს ინგლისურ ენაზე, ენის უცოდინრობა  შეიძლება იყოს მნიშვნელოვანი ბარიერი.

პოპულარული პროგრამირების ენების უმეტესობა  იყენებს ინგლისურს, როგორც ბაზას. შესაბამისად, თითქმის შეუძლებელია კოდირების სწავლა, ინგლისურის სწავლის გარეშე.

როგორ ვისწავლოთ ინგლისური?

ინგლისურის სწავლა რამდენიმე მეთოდით შეგიძლიათ, გთავაზობთ მათგან ძირითადს:

სახლში სწავლება

მათთვის, ვინც ეძებს პერსონალიზებულ ყურადღებას, სახლში რეპეტიტორთან სტუმრობა ან ბინაზე მიღება ხელსაყრელი არჩევანია. ინგლისური ენის გამოცდილი მასწავლებლები მოსწავლეებთან ერთად მუშაობენ თავიანთი სპეციფიკური საჭიროებების შესაბამისად. ეს მიდგომა განსაკუთრებით სასარგებლოა მიზნობრივი უნარების განვითარებისა და ენის ორიენტირებული გაუმჯობესებისთვის.

ონლაინ სწავლება

ონლაინ სწავლების მოდელი დღევანდელი ცხოვრების სწრაფ ტემპთან ყველაზე მორგებული მოდელია.  ონლაინ სწავლების მეშვეობით შეგიძლიათ გაკვეთილებს შეუერთდეთ ნებისმიერი ადგილიდან, ასევე ნებისმიერ ადგილზე მყოფ მასწვლებელთან, იქნება ის თქვენს რეგიონში, ქვეყანაში თუ საზღვარგარეთ.  ონლაინ სწავლება დაგიზოგავთ უამრავ დროს და ენერგიას,  დაგიზოგავთ ფინანსებს და აგარიდებთ დამღლელ გზებს.  ონლაინ სწავლება, თავისმხრივ, სწავლების რამდენიმე განსხვავებულ მოდელს შეიცავს. ძირითადია: ლაივ სწავლება, სწავლება ჩანაწერების მეშვეობით და ჰიბრიდული ანუ შერეული ტიპის სწავლება.  ჰიბრიდული სწავლება საკმაოდ წარმატებული მოდელია, იქიდან გამომდინარე რომ აერთიანებს ფიზიკურ კომუნიკაციას და ონლაინ სწავლას.  ასეთ დროს ძირითადი მეცადინეობა ტარდება ონლაინ და პერიოდულად ხდება შეხვედრა ფიზიკურადაც.

სასწავლო ცენტრები

ინგლისური ენის შემსწავლელი ცენტრები, როგორც ფიზიკური, ასევე ვირტუალური, გთავაზობთ სტრუქტურირებულ კურსებს სასწავლო გეგმით, რომელიც შექმნილია ინგლისური ენის სხვადასხვა ასპექტის დასაფარად – გრამატიკიდან და ლექსიკიდან დაწყებული, საუბრისა და მოსმენის უნარებით დასრულებული.  ინგლისურის ცენტრები გვთავაზობენ სწავლას სხვადასხვა დონეების მიმდევრობით, კონკრეტულად გათვლილ ვადაზე,  ასევე სპეციალიზირებულ კურსებს თქვენი მიზნებიდან და საჭიროებებიდან გამომდინარე, ხშირ შემთხვევაში გაიცემა სერთიფიკატიც.

 სასაუბრო ინგლისურის კურსები უფასოდ

ციფრული ეპოქა და ტექნიკური მხარდაჭერა საშუალებას გვაძლევს გავიუმჯობესოთ ინგლისურის ცოდნა დამხმარე აპლიკაციების სხვადასხვა პლატფორმების დახმარებით, როგორებიცაა:  Duolingo, Babbel, Hello English, Memrise, Cambly Kids,  BBC Learning English, Busuu, HelloTalk  და სხვა.

ვებგვერდის, servisebi.ge -ის დახმარებით, დაიწყებთ ინგლისურის ენის შესწავლას  ნულიდან ან გაიუმჯობესებთ არსებულ ცოდნას.  შეარჩიეთ სასურველი ინგლისურის სპეციალისტი თქვენთვის მისაღები პირობებით,  როგორც ონლაინ, ასევე ბინაზე მისვლით, თქვენთვის მოსახერხებელ ლოკაციაზე.   ვებგვერდი  გაძლევთ საშუალებას თავად შეარჩიოთ მასწავლებელი ან სასწავლო ცენტრი,  ადგილობრივი  ან უცხოელი პედაგოგი, სწავლება ჯგუფურად ან ინდივიდუალურად. 

ამას გარდა,  ჩვენი ვებგვერდი  val-do.com მუდმივად შემოგთავაზებთ საინტერესო და განახლებად ინფორმაციას პროგრამირების შესახებ, ჩვენი პროგრამირების კურსებით კი უფასოდ შეძლებთ პირველი ნაბიჯების გადადგმას ვებდეველოპმენტში.

თუ თქვენ გადაწყვიტეთ მსოფლიოში ყველაზე მოთხოვნადი პროფესიის შესწავლა და მზად ხართ  გაუღოთ  კარი უამრავ შესაძლებლობას - მოქმედების დროა!